عَبالي ..

* عبالي تماري و كعك .. فتة بزيت و كبيس * عبالي صبّارة بساحة الروضة بنص الليل .. و قعدة ب " مورا " لنقول نفس الحكي يلي منقولو كل مرة " و الله هوَيات بيردوا الروح " * عبالي سهرة بجبل قاسيون و القمر كامل مكمّل و نحنا عم نقول سبحان مين خلق و صوّر .. و تجي الفاتورة و نقول كمان متل كل مرة " فظاعة , شو حراميّة , إي شو طلبنا ! " * عبالي إمشي بالبزورية .. ريحة التوابل أشهى من أطيب طبخة بعملها .. و أشتري خلطة زهورات خَرْج الصَمِد أكتر من الشِرب * عبالي إمشي بالحارات القديمة الضيقة و أتفركش بكعبي العالي لمّا يجي ولد من وراي عالبسكليت عم يعيّط " أسّع .. أسّع " و بلش أنا كرفِتْ لحالي ! * عبالي دمعة مي من الفيجة .. و كمشة ياسمين عراتلي من الجنينة , آخد نفس عميق و قول اللهم صلّ على سيدنا محمد كامل النور , و الله شي حلو * عبالي شوف الصبايا عم يتفتلوا ليلقطوا كم تلطيشة من شباب الحارة تبقى معهن تذكار طول العمر .. و قول إيه , اسق الله ! * عبالي إسمع الآذان و قول يا مرحباً بذكر الله .. و نبطل نميمة و عيّ .. نتذكر نستغفر ربنا * عبالي أطمن عالفلّة بأرض الديار .. عالبحرة المرشوشة ورد .. عالمقشات و كراسي الخيزران .. طاولة الزهر و كم أركيلة و قعدة طرنيب و سهرة للصبح * عبالي جّمعة كبيرة مع الأهل .. عجقة و ضحك , طوشة و لوشة , نق و سق متل حمام مقطوعة ميتو بس ما حدا ناوي يدوّر عالطاسة * عبالي قعدة مع رفقاتي .. ضحك يوصل للسما , غالباً مو لشي بس بيكفي أنو مع بعض لنكون مبسوطين و زيادة * عبالي فنجان قهوة مع ماما و بابا الصبح بكير كتير .. إسمع كلمة رضا أعرف إنها لوحدها زوادتي بهالدنيا * عبالي خلص هالمقطع .. و أبكي أبكي أيكي ليطلع كل القهر يلي جواتي على بلدي , يمكن أرتاح شوي ! * عبالي ترجع الشام شامة و نرجع نزين ساحاتها بالفرح و الحب و الحنيّة * عبالي نعيش .. مو نعيش و نتذكر ! ممكن !!!