كل سنة وكل ربة منزل بخير وسلام … تعالوا نستعد بأجمل الوصفات من صنع ايدينا , النهاردة هقدم لكم طريقة سهلة لعمل قمر الدين فى البيت بدل من شراؤه من الأسواق بثمن غالى , فكونى ذكية واعملى كل اللى أسرتك بتحبه وكمان وفرى فى الميزانية .
 
المقادير:

كيلو مشمش مخلى

1/2 ك سكر

200 جرام جلوكوز

5 جرام ملح ليمون

طريقة التحضير:

نضع ماء مغلى على النار ثم نضع المشمش لحد ما يتسلق حوالى 10 د ثم نطفى النار ونصفيه من الماء

ثم نضع المشمش فى الخلاط واضربه لحد ما ينعم خالص ويبقى بيورية

اضع فى حلة الجولكوز والسكر والمشمش واضع الحلة على النار لمدة ساعه على نار هادية مع التقليب المستمر المستمر واول ماتلاحظى انه ابتدى يمسك يعنى يكون عرق اضع ملح الليمون مع التقليب واتركهم حوالى 10 دقايق ثم اطفى النار ادهن الرخامة او لوح خشب كبير بزيت الزيتون ثم اضع قمر الدين وافرده بسماكة حوالى 2 سم ونتركه لمدة ليلة كاملة حتلاقيه بقى قمر الدين زى الللى بنشتريه تقطعيه زى ما انتى عايزة ونضعه فى ورق سوليفان .

وبالصحة والهنا…